ഹൂസ്റ്റണ് : ഹൂസ്റ്റണ് ബെന് റ്റോബ് ആശുപത്രി ഫാര്മസിസ്റ്റിനെ വെടിവെച്ചു കൊലപ്പെടുത്തിയത് അതേ ഫാര്മസിയിലെ ടെക്ക് ആയി പ്രവര്ത്തിക്കുന്ന ജോര്ജ്ജ് വള്ളിക്കാപ്പിലാണെന്ന് ബുധനാഴ്ച ഹാരിസ് മെഡിക്കല് എക്സാമിനറെ ഉദ്ധരിച്ചു ഹൂസ്റ്റണ് പോലീസ് വക്താവ് ജോണ് കാനന് പറഞ്ഞു. വനിതാ ഫാര്മസിസ്റ്റിനെ കുറിച്ചുള്ള വിവരങ്ങള് വെളിപ്പെടുത്തുവാന് പോലീസ് വിസമ്മതിച്ചു.
കോട്ടയം ഈരാറ്റുപേട്ട തീക്കോയി വെള്ളിക്കാപ്പില് കുടുംബാംഗമായ ജോര്ജ് തോമസ്(58) പത്തുവര്ഷത്തിലധികമായി ഇവിടെ ഫാര്മസി ടെക്കായി പ്രവര്ത്തിക്കുന്നു. ഹൂസ്റ്റണ് സെന്റ് ജോസഫ് സീറോ മലബാര് ഫെറോന കാത്തലിക് ചര്ച്ച് ഇടവകാംഗമാണ്.
കൊലചെയ്യപ്പെട്ട ഫാര്മസിസ്റ്റുമായി അടുത്തു ഇടപഴകാന് ശ്രമിച്ചിരുന്നതായും, ഇത് നിഷേധിക്കപ്പെട്ടതിനെ തുടര്ന്നുണ്ടായ നിരാശയും, പകയുമാണ് ജോര്ജ്ജിനെ ഇതിന് പ്രേരിപ്പിച്ചതെന്നാണ് പ്രാഥമിക അന്വേഷണത്തില് നിന്നും തെളിയുന്നതെന്ന് പോലീസ് വക്താവ് ജോണ് കാനന് പറഞ്ഞു.
ഈ വര്ഷം മെയ് ആദ്യം കാലിഫോര്ണിയാ യൂണിവേഴ്സിറ്റിയില് ഇതിനു സമാനമായ ഒരു സംഭവം നടന്നിരുന്നു. പ്രേമാഭ്യര്ത്ഥന നിരസിച്ച സ്ത്രീയോട് പ്രതികാരം തീര്ക്കുന്നതിന് ആറുപേരെ വെടിവെച്ചു കൊലപ്പെടുത്തിയശേഷം തോക്ക്ധാരി എലിയറ്റ് റോജര് സ്വയം നിറയൊഴിച്ചു ആത്മഹത്യ ചെയ്യുകയായിരുന്നു.
സ്ത്രീകള്ക്കെതിരെ ഇത്തരം പ്രകോപനങ്ങള് ഉണ്ടാകുമ്പോള് യഥാക്രമം കാര്യങ്ങള് മനസിലാക്കി ഉത്തരവാദിത്വപ്പെട്ടവരെ അറിയിക്കുവാന് താമസിക്കുന്നതാണ് ഇത്തരം ദൗര്ഭാഗ്യകരമായ സംഭവങ്ങള് ആവര്ത്തിക്കപ്പെടുന്നതെന്ന് ഫാമിലി ക്രൈസിസ് ആന്റ് കൗണ്സിലിംഗ് സെന്റര് ഡയറക്ടര് ജൂഡി കോക്സ് പറഞ്ഞു. സ്ത്രീകളോട് പുരുഷന്മാരും, പുരുഷന്മാരോട് സ്ത്രീകളും എങ്ങനെ പെരുമാറണമെന്ന് പറഞ്ഞു മനസ്സിലാക്കുന്നതിനുള്ള പഠനക്ലാസ്സുകള് സംഘടിപ്പിക്കുന്നതെന്നും ജൂഡി പറഞ്ഞു.
വെടിയേറ്റ് മരിച്ച ഫാര്മസിസ്റ്റിന്റെ പേര് വ്യാഴാഴ്ച ഓട്ടോപ്സി നടത്തിയതിനുശേഷമേ വെളിപ്പെടുത്തുകയുള്ളൂ എന്ന് പോലീസ് പറഞ്ഞു. കൂടുതല് അന്വേഷണങ്ങള് നടക്കുകയാണെന്നും പോലീസ് പറഞ്ഞു.
Comments